පුළුවන්නම් මගේ මතකේ නුඹේ හිතේ ලියාගන්න

ඔරුවකට බර වෙලා දිගින් දිගට පැඳ යද්දි
මට දැනුනා ජීවිතය මගේ ළඟ නුඹ ඉද්දි
සතුට මගෙ සැනසීම නුඹෙ තුරුලෙ නැළවෙද්දි
නොදැනුනා නොවේ මට හිමින් ඇස් පියවෙද්දි

අපි දෙන්නා ඇවිද ගිය මග නිතර හමුවෙද්දි
මතකයන් හිත පුරා මගෙ නිතර පෙරළෙද්දි
නුඹ මගේ සිහින තුළ නිතර දඟකම් කරද්දි
හිමින් නළලත් තෙමුවෙ පපුතුරට නුඹ එද්දි 

හිත පුරා දැකගන්න මගේ හිත ලත වෙද්දි
නුඹ ගියා බොහෝ දුර මම මෙතන තනිවෙද්දි
දුර ඈත නුඹ ගියාට හිත ඇතුළෙ නුඹ ඉද්දි
තවත් ආදරෙයි මම නුඹ එපායැයි කියද්දි

හදවතින් නුඹ ගාව හැමදාම මම ඉද්දි
නුඹ යනෙන හැමතැනම හුස්මක් වගේ එද්දි
පණ සේ රකිමි යයි පුන පුනා මම කියද්දි
ඇයි එපා කිව්වෙ නුඹ ආදරේ මම දෙද්දි

මම මෙහේ මඟ බලන් දොරකොඩට වී ඉද්දි
දුර ඇදී යයිද නුඹ කියා සිත විමසද්දි
දැනටමත් නුඹ මගට ඇති බව හිතට මම පවසද්දි
නුඹ කියයි එන්න බැහැ,මගේ හිත පිච්චෙද්දි

නෑවිදින් හිටියාම ආදරේ අඩුවෙයිද?
නෑ නුඹට වැරදිලා,නුඹ මගේ හුස්ම ටික
නෑවිදින් නුඹ ගියත් මෙය හිතේ ලියා ගන්න
ආදරෙයි හැමදාම නුඹට මම පණ සේම!! 

හිත තැවෙන හැටි දන්නෙ නුඹ නේද වැඩියෙන්ම
නුඹ නමින් මා ඉන්නෙ දැන සිටි නේද නුඹ
නුඹ නොමැති වුවොත් ළග මට කුමක් වේවීද
හිත සින්නකර දුන්නෙ රිදවන්න නෙවෙයි මම

ගැහෙන මේ හිත තාම නුඹ සොයයි සැනසෙන්න
මම ඉන්නෙ හිර කරන් බොහෝ දේ කියන්නට
හඩන සිත ගොළුවේවි දඟ කරන දෙතොල් ලඟ
කන ළගට මම ආවේ ආදරෙයි කියන්නට

කවදා හරි අහස යට අපි දෙන්නා හමුවේවි
ඇතැම්විට වෙන අතක් නුඹේ අත පැටලේවි
ඒ දිනට මගේ හිස් සුරත නුඹට දිස් වේවි
සුරත හිස් වුනු නමුත් හිත නුඹෙන් පිරී යාවී

මියයාවි මා දිනක එදිනට පැමිණෙන්න
මම ආස සුදු රෝස මල් මිටක් ගෙන එන්න
ඇවිත් හඩන්නට එපා නුඹෙ කදුළු බෑ බලන්න
මලක් මා අත තබා දෙයක් මට පවසන්න

ඇත්තටම කිසිදාක නුඹේ සිතේ මා නොසිටියෙද?
මගෙන් මොනවාම හරි වැරද්දක් වුනාවද?
අඩුපාඩුකම් මුකුත් මගෙන් නුඹට උනාද?
දැන්වත් කියන් මට ආදරෙයි නුඹ මෙමට..

මගේ මියගිය සිරුර කර මතින් ගෙනයන්න
දැවෙන ඒ ගිනි ගොඩට මා දමා ඔබ යන්න
නමුත් මට එක වරක් මේ ගැනත් පවසන්න
පුළුවන්නම් මගේ මතකේ නුඹේ හිතේ ලියාගන්න..







මේ 2012 අවුරුද්දේ ශම්මිගේ අවසන් පෝස්ටුව...
හැමෝටම කිරියෙන් පැණියෙන් උතුරණ, කරදර,ජරමර,බරබර මුකුත්ම නැති වාසනාවන්ත සුබම සුබ 2013ක් වේවා..!!!